قصيدة : مازلت باطي ومازال ريحي ما بغاش يواتي

مازلت باطي

النص

ومازال بيدي الحلّ 

ومازلت كل اللي يربطوه انحلّ

ومازلت زي الصقر كيف انطلّ

لين تنكسر تركع عيون الواطي 

ومازال صوتي كي فحل البلّ

يهدر يعاند قوّة الشوّاطي

مازال بيدي الحلّ

ويا صاحبي حيران ما تقدر تطول فحل

غير تو تمشي بالقفا الأوقاتي

ويمكن تشوف الفار هاجم صل 

والجيد باسم اللايشين يهاتي 

ويا صاحبي شقلب كيان الكلّ

نخاف نتكلم تنجرح لهاتي 

وبيغاذ يطفح فاض كان انزّل 

قادر يسويها جبل وشاطي

وزيّك سكني في الجواجي غلّ

والغل يسكن كان راجل عاتي 

باقي العلوجة الساكنه في الظلّ

كلاب ضالّه تدغر على الملفاتي 

ومازلت باطي 

مازال ماضي حدّي

ومازلت واقف عل قوايم قدّي 

ومازال ريحي ما بغاش يهدّي 

يعصف ويسوي العالية بالواطي 

ومازال بحري فاض موجه يدّي 

لا فيه مرسى ولا عليه شواطي 

ومازلت نرزم بالقوافي نصدي

نثبّت وحاكم غرزتي ورباطي 

ومازلت في الميعاد فايح ندّي 

دلالات في صمّ الحجر بصماتي 

ومازلت من سوق البلا متعدي 

صيود الوغي تجفل تهاب عياطي 

أنا من سلالة بو جبين مندّي

اللى لغير ربي لا ركع لا يطاطي 

حني من كسب لشقر وليه تجدّي

رجال تنكسر تركع قداه تواطي

ومازلت باطي ومازال ريحي مابغاش يواطي

ومازلت في الأبعاد 

ومازلت نقطع واد نلقى واد 

ومازال بي يميعد الميعاد

وحتى الصدق في غيبتي متواطي

وعودي قدي دخن برد سواد

سواد من لهايب شاعلاله واطي

ومهري شرد وتقطعت الأمراد 

وطيحت زادي طاح من مخلاتي

والأيام حكمت ع الكبير أنكاد 

والأيام لا واطت تزيد تواطي

والأيام ديره وحايفه وجدّاد 

والأيام لعبت خربقة غلاّطي

والأيام هي اللي جيّبت الأولاد

وعاد المهطّي يقول هذي وطاطي

ومازلت يا سود الهذب نشّاد 

وننحب على برّك وبيه اناّدي

ونقطع برور الواسعة وأصناد

مزازات في مزازات برّي خاطي