منير اللطيفي

 

تنهّدت ما هوّن عليّا دايا ***كميت داي عيني ما لفاها النّوم

ردّيت عل وجهي بطرف غطايا *** لقيت طيفها تحت الغطاء مرسوم

البيه وقت تيعدّي النهار حذايا *** ملازم خياله ما خطاني يوم

هو رفيق السّفر دوم معايا *** وهو دايره للنّفس زادي دوم

البيه شبحته عند المرض دوايا ** مجلّي على الخاطر جميع الشّوم

ليه وصف دون الخلق ليه مزايا ***وليه فرق بعد الارض عاللي نجوم

من دون جيله بجّله مولايا *** خلقله روامق هذبهم مسموم

خلقله عوارض يشبهو المرايا *** وبان غثّها فوق جوفها مردوم

القدّ مثّلته مثيل سرايا ***يبان راصعه جبريل باغلى سوم

من الخصر للرجلين كيف بنايا *** وعرصات مرمر من زمان الرّوم

كلام قايله يا ناس موش دعاية *** وزين الشبحته بنوصفه ملزوم

يستاهله سود الهذب غنايا *** اللي زينها عل جيلها متموم

ولوكان حول بيوصفو الغنّاية *** ما يتم وصفه وشمة القطّوم

قدومه مخلّي الفارغات ملايا *** بشير خير وجهه لا لفي عل قوم

من الحوض للمشهد لكل نحايا *** لوين المرابح دايرات خشوم

عم خير ربّي طمّن السعّايا *** رحم من طلب فضله بليله و يوم

مانيش عاللي يكسبو الرّغايا *** ولا برّ فيه الشايمات تهوم

لا بيع فيه بنحسد الشّرايا *** ولا قصر عالي مالكه وحسوم

اني غناي عاللي منه كابر دايا *** اللي داه خلّى خاطري مقسوم

من يوم شفته ما عرفت هنايا *** حيّ في الحياة ومن شوفته معدوم

نظلّ شايله في النّفس طول رجايا *** وفي البال لين يوم القيامة يقوم

-------------------------------------------------------------------------

تنهّدت ما هوّن عليا دايا *** وكثر الكدر نزّل دموع العين

من شيء كاتب قدّره مولايا ***تركني جهامة عل الفراش مهين

بين حزن بين دموع بين نهاية *** وبين جرح موش باري خذوه سنين

وظلّيت عل ها الحال قل شفايا *** وفنيت هايم عل الفرج ضنين

وقعدت نكمي ثاقلات خطايا *** ومحتار فكري بين جيم وسين

اني حسبت ما يديرش معاي سوايا *** وعل قدّ ما نقسى عليه يلين

وعل قد ما نخفف قداه خطايا *** نلقاه تاركني بعدني وين

اني حسبت ما يديرش معايا سوايا*** وعهده معايا واخذه بيمين

رابط

عانيت صقع الليل وانت وينك؟

وانت وينك 

عانيت صڨع الليل وانت وينك
نا والڨمر لثنين مستنينك
_ نمت هنية 

عاهدتني وهانت عليك الجية 

خليتني سهران عيني حية
مذبوح زي الطير بسكاكينك
عانيت صڨع الليل......

_عشت ليالي 

ذڨت العناء لاكن موسع بالي 

نلڨاك نخلة طالعة في العالي
ذڨت التمر ماطاب في عراجينك
عانيت صڨع الليل.......

_ڨاعد نرجى 

وفي الثانية لوجاع تطلع درجة 

وخليتني ممروج يعطك مرجة
اماليك ظني عالجفاء مربينك
عانيت صڨع الليل.....

_ضاڨوا خلوڨي 

ركبت الغرام معاك وإنت تسوڨي 

ولاش تستحي كي تڨولي معشوڨي
ولاعشڨ كي العشاڨ بيني وبينك
عانيت صڨع الليل وانت وينك......

رابط