الشيخ حمود التخة

داني داني

يحير الطايرين

الشيخ السلخ الشعانبة

شداني الخو غادي حواس

نجوع سقر

ياطالعين الجبل

ياطالعين الجبل

ريم البنا

ريم البنا

ياطالعين الجبل بانديرا

بانديرا

أغاني جزائرية

عبد الوهاب سليم

يابلارج فضيلة دزيرية

الفرقاني

خليفي احمد نوبة كردادة

قمر الليل

قولولها يا الزايخة

حكاية مسعودة

نوبة لحسين عباس ريغي

أبو بكر سالم

خلي لي حالي

يا عين لا تذرفي الدمعة

الهجران

زيدورة

زيدورة 

زيدورة الشيخ بوجمعة

زيدرة الفنان عمراوي

كان انت مريول الشيخ السلخ

مديح

النجع مقبل

قصيده تروي استرجاع الشعانبه الابل المسروقه من اركان المغرب الاقصا هي الشيخ القاسم حوالي سنه 1870م

قصيدة لمعركة رد البل في حاسي الغيشة

شداني يا خويا غادي حواس

كلنت الناس قراب

ياحمام

دبر عليا

من مسعودة هاسضة عني لمحان

بوجمعة خنوس وثائقي

راس المحنة

البار عمر

رابح درياسة

راس المحنة

قصة راس المحنة هي أسطورة نظمها الشاعر سيدي لخضر بن خلوف ، أحد فحول الملحون الجزائري ، تحكي حوارا دار بين رجل اسمه بن مرزوق و جمجمة إنسان عثر عليها في الصحراء ، فحاول استنطاقها حتى يعرف كيف وصل بها السبيل إلى هنا . في النهاية صاحب الجمجمة باح بسره و بهويته الكاملة ، فهو “الهاشمي بن نونة ابن سيدي المختار” ، رجل تاه عن قافلته المتجهة إلى الحج ، فلقيه قطاع طرق و قتلوه ، و ألقوا بجثته في العراء إلى أن مرت به قافلة دفنته . الهاشمي بقي في قبره ستين سنة كاملة لكنه لم يرتح طويلا ففاض الواد بعد سيل من الأمطار و أُخرِج إلى العراء لثلاث سنوات ، حمل جمجمته رجل خير و وضعها في مأمن عنده لكن زوجته احتارت في أمره و ظنت أنها لزوجته السابقة ، فقامت بحرقها مع حجارة القدر ، و لما يئست منها رمتها من جديد في العراء ، ليجدها في الأخير بن مرزوق

 شخصيات القصة:

بن مرزوق : الرجل الذي يستنطق الجمجمة

راس المحنة : الهاشمي بن نونة

كاتب كلمات هذه الأغنية:

هو الشاعر ولد الحمدي ، عن القصيدة الأصلية لصاحبها سيدي لخضر بن خلوف ، و قد تم إضافة /تعديل العديد من الأبيات ، لكن مع المحافظة على الفكرة الرئيسية و الاحتفاظ بهوية الهاشمي ين نونة بأمانة

[مقدمة]
بسم الله نبدا ذا القول لي فاهم --- من عند فحول التنظيم في الملحون
داروا بيه قصيَّة مْصاوبة بهواهم --- قصّة بن مرزوق كلامها موزون
كيفاه تلاقى هو و راس بنادم --- و بقى حاير هذا الراس واش يكون
اتخاطب هو و ياه كيما لازم --- و حكالو ذا الراس على لي مكنون
اسمعو هذا القصة بقول الناظم --- تفهمو ما يقصد بيه في المضمون

جيت انسالك و انتايا ترد جوابي --- حشمتك بالله يا راس جاوبني
هذا برّك و الا جيت براني --- يا راس المحنة لله كلمني (x2)

الجزء الأول
ياذا الراس الباقي في بلاد القفرة --- سلتك بالجوّاد الواحد القيوم
الباعث الوارث خالق لا يرى --- ما دام الدهر والأيام ليك ادوم
يزرع فيك الروح تعيد لي كيف اجرى --- واحكيلي بلي جازوا اعليك هموم
المولى قادر يحييك ولو مرّة --- وتحدّثني يا ذا الرّاس بالمكتوم
حدّثني واحكيلي وعيدلي واش صرا --- كيما ريتك يقظة زورني في النوم
تعمل خير وتبقى حكايتك مشهورة --- تحفظها الجواد عليك يا مرحوم
يا راس بنادم خلّيتني في حيرة --- وأنا قلبي ضايق بالجفا مضيوم
مكتوب الله والنية وهاذ الخطرة --- كانت سبّة وتلاقيت بيك اليوم
أشكون أنت ومنين لاحتك القدرة --- أتكلم لله عليك خبّرني
هذا برّك والا جيت برّاني --- يا راس المحنة لله كلّمني

هذا برّك و الا جيت براني --- يا راس المحنة لله كلمني

الجزء الثاني
اشكون أنت خبّرني ودير القمنة --- واتكلم لله عليك جاوبني
كان أنت مسلم في الدين مـ أهل السنة --- قلبك طامع بالتحرير متهنّي
والا أنتايا كافر ما تشوف الجنّة --- تخلد في نار الجحيم يا فاني
والا يهودي مضلول مالك ظنة --- والا من أهل الكتاب نصراني
والا أنت عالم في الدين مولى قمنة --- تفتي بالآية وحديث ربّاني
والا أنت شاعر قوّال مـ أهل القانة --- زاهي في جلسات حديث ومعاني
والا أنت مدّاح قصايدك تتغنّى --- ومعاك القصّابة دايما ترني
طبلك يرعد والخودات ليك مقانة --- وأنتايا تتمولك خاطرك هاني
والا أنت سارق قبضوا عليك خيانة --- باعوك بقيمة ربعين سلطاني
يهديك الله يا ذا الراس عيد علينا --- لان توقف في النوم تشاهدك عيني

الجزء الثالث
حشّمتك يا هذا الرّاس باسم المولى --- حدّثنتي واصغى ليا وكون لبيب
كان أنت مسبّل راح رزقك جملة --- ولي مالو ضاع من العقل يغيب
والا أنتايا طالب حافظ كتاب الله --- سافرت لحفظ القرآن مت غريب
والا أنت والي تنزار من أهل الله --- يجعل لنا ربّي في رضاك نصيب
والا أنت مجاهد رافع علام الله --- عديانك مرهوطة راهبين رهيب
والا أنت قاضي معروف في العدالة --- تحكم بين الناس وما ظلمت طليب
والا نتا خوجة كتّاب عند الدولة --- خطّك جايز عند الناس ليس يخيب
والا أنتيا ساحر مالك أهل الذلة ---- طاعوك رواحين الجان بالترجيب
والا نتا ماكر نصاب للضلالة --- من صغرك ظالم وما رحمت حبيب
واش تكون أنت في الناس يا عبد الله --- سلتك بجاه الرّحمن جاوبني

هذا برّك و الا جيت براني --- يا راس المحنة لله كلمني

الجزء الرابع
شرقي والا غربي يا ظريف المحنة --- والا قبلي جيت تهوم في لوطان
والا حضري ما هنّاك حال مدينة --- جيتْ تبدّل حال وطالب الأمان
والا نتا خاطر وما دريتْ بفانة --- ما جبت خبر حتى صُرْت في لكفان
قبضك ربّي راك اليوم في جبّانة --- والسّابق لاحق مرصود في لديان
والا جافي عالحباب مالك ظنة --- والا قاتل روح على اهلك هربان
طالت بيك الغربة وزادتك غْبَيْنَة --- وقعادك في الغربة زادلك المحان
والا أنت يتيم وما جبرت محنّة --- من قلة واليك جريت في لوطان
قلت أنت ما نصبرشي لهاذ الهانة --- نهجر ونفاجي علْـ خاطري لحزان
نمشي في ملك الله لا غنى نتهنّى --- بالاك يسهّل ربّي ندير الشّان
الرّزق مع الروح انتاج حتى نفنى --- والا يلحق وعد الله يدّيني

هذا برّك و الا جيت براني --- يا راس المحنة لله كلمني

الجزء الخامس
خبٍّرني يا هذا الرّاس دير الهمّة --- باغي نعرف واش تكون في معناك
كان نتا سلطان على زمان الأمة --- بغوايط وسناجق زاهرين أوراك
والا أنت تركي شوّاش مـ أهل الزدمة --- أمير الدّيوان قسا عليك نفاك
والا أنت طبيب وكنت مولى حكمة --- ما داويت الناس دواك راح معاك
والا أنت مولى صنعة وعندك همّة ---- تحكم في الصّنّاع دير كي يهواك
والا أنت نجّار صوالحك مقيومة --- ما تقطع في الغابة غير ما يرضاك
والا أنت جزّار حدايدك مسمومة --- ما تذبح في الجلبة غير ما ماواتك
والا أنت عطّار حوايجك مشمومة --- مرجان وحنّة وروايح ومسواك
والا أنت حرّار على خيوط مرمّة --- تنسج للخَوْدَات قفاطن وحياك
والا أنت حدّاد صنايعي في الخدمة --- واطّوع في القاسي في جْمر يسني

هذا برّك و الا جيت براني --- يا راس المحنة لله كلمني

الجزء السادس
خبّرني يا هذا الراس ولو مرّة --- قولّي واش تكون وعيد لي الخبار
كان أنت مدرس في الجموع الغُفرة --- وتعلم للطّلبة في علوم كبار
والا أنتايا عالم في الجوامع تقرا --- تعرف حق الله وما عملت العار
والا أنت فلّاح شجات بيك الثّمرة --- وغرست الغلّة بألوان في أشجار
وزرعت الأرض وولّات جنة خضرة --- والقمح على ما ترى العين اصفار
والا أنتايا تاجر مالك التجارة --- ومنعت الزكاة وما عطيت اعشار
والا أنت دلّال سماسري بالغدرة --- بين البايع والشاري قدِيت النار
والا نتا صيّاغ صياغتك مشهورة --- ذهبك صافي شهدولو أهل التعيار
حشّمتك بسم الجوّاد مول القدرة --- ولي خلقك يا ذا الراس وخلقني

هذا برّك و الا جيت براني --- يا راس المحنة لله كلمني

الجزء السابع
والا أنت درت السّبيل لأهل الهانة --- تفتي في سبيل الله نلت الجاه
تقلع ضيق المغبونين ولي عانى --- وتكسِّي ليتام رضا عليك الله
فرض الموت عليك ولازم من الفنا - كيما سرت نتا نمشو حنا لقضاه
تلقى سعدك زين ان شاء الله بدعانا --- بين الحوريّات تكون في تنزاه
والا كانت نفسك ظالمة خوّانة --- خنت الملح وهنت الجار في معناه
والا أنتايا شاهد زور درت خيانة --- عُنْت الظالم عالمظلوم زدت بلاه
درت الدّين على الدّنيا سباب بلانا --- كذا من بخيل بقى المال وراه
والا مولى ليل وزادلك مولانا --- واصبرت لمكتوب الله كيف عطاه
حدّثني يا هذا الراس دير القانة --- منك خضرة الخير ان شاء الله نرجاه
سلتك بجاه الرّسول بن يمينة --- والي خلقك يا ذا الرّاس وخلقني

هذا برّك و الا جيت براني --- يا راس المحنة لله كلمني

الجزء الثامن
يا ذا الراس الفاني كانك راس امراة --- بعد الهمّة والظّفرة امسيت عظام
ما كانت مولاتك زايخة مشهورة --- في نجوع بهمّة تعشي على لريام
ما مشطاتك شاو الصوم غير صغيرة --- ما هزاتكشي هجرة وريح اغرام
ما كانت مولاتك تايهة بالنّظرة --- ما طعنت قلوب الوالعة بسهام
ما دخلتشي بيك اعراس كيما نرى --- ما شدّاتكشي بعمايم التُّغْرام
ما مدحت فيها اوصافها شعراء --- ما كتبت في زين اوصافها لقلام
ما ركبت قَوْمَان عْقَابْها تَسَّارَى --- تندهْ في فرسان لحيف في تنظام
ما ركبت هودج على جمال الصحراء --- ما ساقت جحفة بالخيل يوم زحام
أهل كحيل يصولوا للعدا بالفخرة --- مثل السّورة عليها دايرين حزام
أهل سروج القاضي في رجال النعرة --- بمكاحل وسكاكن نارهم تسني

هذا برّك و الا جيت براني --- يا راس المحنة لله كلمني

الجزء التاسع
من بعد لي حدّثتو عطاني قمنة --- ونطق ليا باذن الله جاوبني
قال أنايا اسمي الهاشمي بن نونة --- مولى حكمة قاع الناس تعرفني
جدّي من مصر وعاش في قسنطينة --- يسّمى سيد المختار بن هنّي
وأمّي من جبل زواوة سماها يُمْنَى --- بوها من الأشراف على أصلو حسني
جيت مقبّل رابح قاصد المدينة --- نوصل لقبر الرّسول متمنّي
في جدّة راحوا لصحاب و تفارقنا --- خرجوا ليا ذا الظُّلام قتلوني
وبقيت مطيّش في الأرض العُريانة --- حتى جاو صحاب الخير دفنوني
عاشرت المدرار لحساب ستين سنة --- حتى وين حمل الواد كركبني
ثلث سنين عداد بقيت في ذي الهانة --- ولي مكتوبة في الراس تلحقني
ماذا قاسى هذا الراس ماذا عانى --- نطلب من الله الرّحمن يرحمني

هذا برّك و الا جيت براني --- يا راس المحنة لله كلمني

الجزء العاشر
بعد عذابي ثلث سنين في ذي الهانة --- حن عليا ربّي دار لي تيسير
ارفد راسي مُولى خير دار القمنة --- في طوع الله قال ندير فيه الخير
حطّوا في صندوق وغاب يا فُطَّانة --- مرتو شكّت وهي عليه تغير
ادّاتو لعجوزة كافرة كهّانة --- قالتلها بنتي واش راه يصير
هذا الرّاس لمرتو اللاولى يمينة --- يتفكّرها ديما كيف كان صغير
أحرقيه وما تبقايشي مغبونة --- ورمادو يدّيه الريح بيه يطير
أحرقيه وهنّي خاطرك اشنانة --- وتنحّي من قلبك بيه همّ كبير
وإذا خليتيه يزيدلك غبينة ---- يبقى بالك لاهي غير بالتّفكير
أحرقيه وديري واش قوتلك أنا --- اتخليه تخلي راجلك للغير
وكتبلي مكتوب الله في ذا المحنة --- حتى نوصل في يد مراة وتحرقني

هذا برّك و الا جيت براني --- يا راس المحنة لله كلمني

الجزء الحادي عشر
راحت بمحنتها حازنة مَكْوِيَّة --- حلفت تخلفها منّي ترد الثار
الشيطان غلبها ودار فيها كيّة --- بالشحنة دارتني منصبة للنار
هذا مكتوب الله كيف راد عليا --- ونصبت الكانون أنا وزوج حجار
مدّة سنة والنّيران تلهب فيا --- وصبرتلها وأنا في لظى لجمار
قاسيت محاين لقدار في ذي الدنيا --- زادتني ذي المخلوقة على لقدار
ما كان اللي سلّكني ودار مزيّة --- حتّى راجلها ما جابليش خبار
انساني حتى هو وسلّم فيا --- وصبرت على الهم نهار بعد نهار
هذي هي القصّة يا عشير الدُّنيا --- ميّت قاسى في الدنيا عذاب النّار
من بعد النّار لي ما قضات عليا --- وما طاقت تقلب عظم الشّقاء لغبار
ما صابت في التّالي واش تعمل بيا --- جابتني في هاذ الواد لاحتني

هذا برّك و الا جيت براني --- يا راس المحنة لله كلمني

الجزء الثاني عشر
وتلاقيت اليوم معاك كي راد الله --- أسترني يا بن مرزوق وادفنّي
هذي قصّة هاذ الرّاس يا أهل الله --- خوذوها وأحفظو كلامها منّي
شوفو لبنادم العزّ كيفاه ولّى --- كيما كان يكون نهايتو فاني
سيدي لخضر خلّى ذا الحكاية مثلى --- تحفة في فنّ الخيال تعجبني
جاب حرير الدّودة ودار منّو حلة --- وأهداها لبن المختار بن هني
وأنا زدتلها برضاه كم من وصلة --- والله يجعل مولاها يسامحني
واش نزيد أنايا على عسل النّحلة --- غير حلاوة جات على هوى فنّي
سيدي لخضر بن خلوف دار الحلّة --- نظّمها بكلام رزين ومعاني
وختمها بصلاة على إمام الرُّسْلة --- صلى الله عليه الفين بلمفني
أرحم يا ربّي مدّاح رسول الله --- وارحم بن مرزوق معاه وارحمني

هذا برّك والا جيت براني --- يا راس المحنة لله كلمني

الجزء الثالث عشر/ الخاتمة
تمّت هذا القصيدة على نغمتنا --- وتمّت ذا القصة كيما يتم الكون
واش استخلصنا منها وواش فهمنا --- وواش ادّينا منها يا أهل المكنون
سيدي لهمو ربّي باه نظّمّنا --- هذا القصة خلّاهانا في الصَّوْنْ
سدّاها بخيوط حرير ونسجلنا --- نسج مرمّة وعمل فيه كل فنون
و اللي يعرف مغزاها يفكّ المعنى --- يلقى فيها حكمة داخل المضمون
معنتها هذ الدّنيا تزول وتفنى --- وما يبقى غير الخلّاق في ذا الكون
قصة راس بنادم غير قاف ومعنى --- جات لسيدي فكرة كلامها موزون
وأنا ولد الحمدي عطيتها ذا البنّة --- وطامع نلقى في الحاج الحبيب العون
هو شيخي وانا لقيت فيه الظّنّة..... واعطاني سر التنظيم في الملحون
برضاية لشياخ انّال ما نتمنّى ..... ونرجى في مولى الحلة يكافيني

هذا برّك و الا جيت براني --- يا راس المحنة لله كلمني